Caminos ta salbar a lengua...
As luitas cainitas que matan l´aragonés dende que a Anchel Conte l´ocurrió de comenzar a reibindicar-lo (ya´n fa cuasi cuaranta anyadas!), no dixan beyer, a sobent, iniziatibas que de berdat sirben ta refirmar ixe edifizio biello y inestable que ye a lengua.
Por exemplo, grazias a o Ligallo de Fablans de l´Aragonés, se fan en Ansó y Echo (o bastión oczidental d´a lengua, encara que no totz lo reconoixcan) cursos d´aragonés ta personas que i biben pero no eban teniu a oportunidat d´aprender-la de chicotz. En o mundo actual as personas pueden marchar sin barraches: as zarradas comunidatz montanyesas perteneixen a o pasau, y ta l´Alto Aragón biene personas de totz os orichens. Si no se creyan caminos ta que ixas personas aprendan a lengua d´o país, l´aragonés abrá perdiu a batalla ta cutio...
En a bal de Benás, Carmen Castán contina amostrando o benaqués a os misaches en as escuelas; o conzello de Benás fa un concurso anual do partizipan dezenas de críos y bezinos que no quieren oblidar a lengua, que ye publicau dimpués; as donas de Bilanoba han feito a traduzión d´un libro de literatura contemporania; etc.
I ha iniziatibas que s´oblidan, porque importa més que uno dezida d´escribir con V, con H u con T final. Pero en Echo y Benás, y también en altros lugars que costaría més de ennumerar, i ha chen que treballa en cuestions concretas que fan onra a o futuro de l´aragonés.
Facta, non verba (pero de berdat).